意外(2)—社區輔助
date:2008-5-20
上月媽媽發生意外，腳睜骨折，回家休息。最大問題首要是要解決每天饍食。
由聯合醫院社工轉介，明愛社區中心提供，早晚送餐服務；由義工送餐，兩餸一飯，格天有湯或生果。解決了這個需要，我比較可以專心上班，如果無送餐唔知點算！（要六點起身煮飯？）。在此之前，跟本無想過要用到這服務，或者社區會有這服務提供．．．。收費跟據使用者的資產；分三級，由十幾蚊到三十幾蚊一餐，費用只收回成本，我覺得就算三十多圓一餐，亦算合理，因為是需要。媽媽的資產計算，收取十幾蚊一餐。可惜媽媽不大欣賞飯餐，強烈反對，使我承受極大壓力，除此之外生活上各項細節都出現強烈掙論。
還有安排覆診時間，由誰人倍伴，自己是否要請假。還好媽媽有四子女在香港，兩個孫囝，孫囡都成了年，可分擔部份工作，或者算是媽媽她的年代生多幾個子女的好處。
由於星期六放下午，放工後要煲湯，煮飯。原因媽媽很喜歡自己買餸，煲湯，煮飯。買飯只指定食某一間。為了唔想佢郁手，所以，煲湯，煮飯成為我每星期六節目。唔好睇小這個動作，足夠做由下午到晚上，當然要洗碗。
到星期天可以訓晏啲，起身抺地，洗厠所、洗衫、清理cha cha 屎盆和食物盆（這些平時都是由我負責），到樓下鹵味店買雞飯給媽媽吃，自備青菜，之後，可能自己出去食早午餐，跟着，買料煲湯及到超市買日用品，已三四點了，四、五點開始洗料煲湯睇火，六點幾去買餸煮飯，七點幾八點食飯，食完飯洗碗，已是9-10點，一天這樣又過去了。這個多月都無時間睇書了，有次星期天舊同學相聚會，都未敢答應出席，晚上飯局都未可一口答應。
發覺到，原來一個人做兩個人的工作都幾辛苦（五天半工作再加天半買、煲、煮、洗），不知是自己做得慢或要求高？媽媽平時都做又唔覺佢辛苦，當你喜歡煲湯，煮飯是幾開心（如果我單身一個，煮食一品窩算啦！仲點會煮兩/三餸一湯，或者在街外食完返屋企，食完返家瞓覺），但當煮飯這是工作又如何呢？。原來平時食慣飲慣媽媽飯和媽媽湯，日日如是不以為奇。當角色對調後，可能你會發覺對方的重要性，其實，對方都有付出的。
願世上人們，多些欣賞她人。
願你選擇的伴侶，愛你及你的父母，如同自己的父母。
多謝明愛社區中心（南山村）曾姑娘及各義工。
